ڕۆژی پێنجشەممە 21ـی 4ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە خاتوو كەتی گیلمۆر جێگری كۆمیساری باڵای مافەكانی مرۆڤی سەر بە ڕێكخراوی نەتەوە یەكگرتووەكان و شاندێكی یاوەری كرد.

لە دیدارەكەدا جێگری كۆمیساری باڵای مافەكانی مرۆڤی سەر بە نەتەوە یەكگرتووەكان سوپاسی سەرۆك بارزانی كرد بۆ ڕەخساندنی دیدارەكە هەروەها ستاییشی سەركردایەتیكردنی سەرۆك بارزانی كرد بۆ ڕێزگرتن لە مافەكانی مرۆڤ و پاراستنی پێكهاتەكان و بە سەرنجڕاكێشی وەسف كرد. هەروەها ڕاشیگەیاند كە جیهان ئەو پێشوازییەی گەلی كوردستان لەبیر ناكات كە سەرباری بوونی تەحەدیاتی ئەمنی و ئابووری لە ئاوارە و لێقەوماوان كردوویەتی. جێگری كۆمیساری باڵای مافەكانی مرۆڤی سەر بە نەتەوە یەكگرتووەكان وێڕای ئاماژەدان بە نەهامەتییەكانی گەلی كوردستان و عێراق، هێمای بەوەدا كە بە بەراورد لەگەڵ بەشەكانی دیكەی عێراق، كوردستان مەودایەكی بەرینە بۆ ئومێد و كەرامەتی مرۆڤ. هەروەها پێزانینی هەبوو بۆ ئەوەی كوردستان لەسەر بنەمای لێبوردەی و دادپەروەری و پاراستنی یاسا و مافی مرۆڤ بنیات نراوە و جێگەی خۆشحاڵیی كۆمەڵگەی جیهانییە كە كوردستان تەنانەت لە چركەساتەكانی شەڕ و تاریكی و سەختیشدا پابەندی پڕەنسیپە مرۆڤییەكانە، هەر ئەو ڕەفتارەیش خۆی لەخۆیدا وەڵامێكی كاریگەرە بۆ ئەوانەی زوڵم و كارەساتیان دەرهەق گەلی كوردستان ئەنجامداوە.

لەبەرانبەردا سەرۆك بارزانی بەخێرهاتنی شاندی میوانی كرد و باسی لەو نەهامەتییانە كرد كە لە مێژووی عێراق و لە كاتی پەلاماری تیرۆریستان بەسەر خەڵكی كوردستاندا هاتووە و ڕایگەیاند كە گەلەكەمان مافی پێشێل كراوە بۆیە زۆر بە باشی لە مانای ماف و پاراستنی مرۆڤ دەكات و جەختیشی كردەوە كە نەهجی كوردستان لە كاتی شەڕ و ئاشتی و ململانێكاندا پاراستنی مافەكانی مرۆڤە. سەرۆك بارزانی دەستخۆشی لە تیمە نێودەوڵەتییەكانی چاودێریی مافەكانی مرۆڤ كرد و بە پێویستی زانی ئامۆژگاری و بیروبۆچوون و تێبینییەكانیان لەبارەی پێشێلكارییەكان بەهەند وەربگیرێن و بەدواداچوونیان بۆ بكرێت. هەروەها ئەوەی بۆ شاندی میوان خستەڕوو كە كوردستان ئومێدی بە كار و چالاكیی ئەوان هەیە و ئامادەی هەموو جۆرە هەماهەنگی و هاوكاریی كۆمیسیۆنی باڵای مافەكانی مرۆڤی سەر بە نەتەوە یەكگرتووەكانە و داوایشی كرد كە حكوومەتی هەرێمی كوردستان لە هەر جۆرە پێشێلكارییەكی مافەكانی مرۆڤ ئاگادار بكەنەوە.

بارودۆخ و ژیان و گوزەرانی ئاوارەكان و چۆنییەتی یارمەتیدان و هاوكاریكردنیان تەوەرێكی دیكەی كۆبوونەوەكە بوو و تێیدا سەرۆك بارزانی ئەوەی بە شاندی میوان ڕاگەیاند كە گەلی كوردستان سەرباری بوونی شەڕ و كێشەی زۆر یارمەتیدانی خەڵكی ئاوارەی بە ئەركێكی مرۆڤی و نیشتیمانی زانیوە و حكوومەتی عێراقی و كۆمەڵگەی نێودەوڵەتیش وەك پێویست هاوكاریی هەرێمیان نەكردووە لە یارمەتیدانی ئاوارەكاندا.

سەرلەبەیانیی ئەمڕۆ 3 - 4 - 2016 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە باڵیۆزی نیازپاكیی نەتەوە یەكگرتووەكان هونەرمەندی ناوداری عەرەبی ئیماراتی بەڕێز حسێن ئەلجەسمی كرد كە بە مەبەستی كردنەوەی چەند پرۆژەیەكی خێرخوازیی مانگی سووری ئیماراتی سەردانی هەرێمی كوردستانی كردووە.

لە دیدارەكەدا كە بەڕێز كونسوڵی گشتیی ئیمارات لە هەرێمی كوردستان و ژمارەیەك لە بەرپرسانی مانگی سووری ئیماراتی ئامادەی بوون، بەڕێز ئەلجەسمی خۆشحاڵیی خۆی بە سەردانی هەرێمی كوردستان دەربڕی و سەرسامیی خۆیشی بۆ میواندۆستیی خەڵك و پێشكەوتوویی هەرێمی كوردستان پیشان دا. ئەوەشی ئاشكرا كرد مەبەستیانە لە سەردانەكەیاندا پەیامی هەرێمی كوردستان بگەیەننە جیهان و پەیامی ئیماراتیش بگەیەننە هەرێمی كوردستان كە ئامادەیە بۆ هاوكاری و یارمەتیدانی ئاوارە و پەنابەران و سووككردنی ئەو بارە قورسەی كە بەو هۆیەوە كەوتۆتە سەر شانی هەرێمی كوردستان.

هەروەها باسی لە بەشداریی خۆیان لە كردنەوەی چەند پڕۆژەیەكی خزمەتگوزاریی مانگی سووری ئیماراتی لە هەرێمی كوردستان كرد كە بۆ خزمەت و هاوكاریی ئاوارە و پەنابەران لە هەرێمی كوردستان ئەنجامیان داون وەك كردنەوەی كەمپێك كە لە 632 یەكەی نیشتەجێبوون پێكدێت بە تەواوی پێداویستی و خزمەتگوزارییەكانیەوە وەك قوتابخانە، مزگەوت، ئاو و كارەبا، پاركێكی یاری منداڵان و یەكەیەكی بەڕێوەبەری كە دەبێتە سەنتەرێكی فریاگوزاری بۆ ئاوارە و پەنابەران لە سنووری پارێزگای هەولێر و كردنەوەی نەخۆشخانەیەكی 58 قەرەوێڵەیی منداڵان و لەدایكبوون و دانانی بەردی بناغەی نەخۆشخانەیەكی تایبەتی تا.

لای خۆیەوە بەڕێز سەرۆك وەزیرانی هەرێمی كوردستان خۆشحاڵیی خۆی بە سەردانی بەڕێزیان پیشان دا و سوپاسی كار و چالاكییە خێرخوازی و مرۆڤییەكانی بەڕێزیانی كرد و هیوای سەركەوتنی لە كارەكانیدا بۆ خواست. هەروەك سوپاسی حكوومەت و سەركردایەتی وڵاتی ئیمارات و مانگی سووری ئیماراتی كرد بۆ ئەو خزمەتگوزارییە مرۆییانەی كە لە هەرێمی كوردستان و وڵاتانی ناوچەكە و تەواوی جیهان پێشكەش بە لێقەوماوان دەكەن.

بەڕێزیان هەروەها هیوای خواست كە پەیوەندییەكانی نێوان هەرێمی كوردستان و ئیمارات لە هەموو بوارەكاندا بەرەوپێشەوە بچێت و سوپاسی ڕۆڵی بەڕێز كونسول و كونسوڵخانەی گشتیی ئیماراتی لە هەرێمی كوردستان كرد بۆ كاركردن لەسەر گەیاندنی كۆمەك و هاوكاری بە ئاوارە و پەنابەران لە هەرێمی كوردستان و هەوڵدانی بەردەوامیان بۆ برەودان بە پەیوەندییەكانی نێوان هەرێمی كوردستان و ئیمارات.

لە كۆتایی دیدارەكەدا بەڕێز سەرۆك وەزیرانی هەرێمی كوردستان نامەیەكی سوپاس و پێزانینی پێشكەش بە بەڕێز ئەلجەسمی كرد.

ڕۆژی شەممە 26ـی 3ـی 2016 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە بان كیمۆن سكرتێری گشتیی ڕێكخراوی نەتەوە یەكگرتووەكان و شاندێكی یاوەری كرد كە پێكهاتبوو لە جیم یونگ كیم سەرۆكی بانكی جیهانی و ئەحمەد عەلی سەرۆكی بانكی گەشەپێدانی ئیسلامی و جان كۆبیس نوێنەری تایبەتی سكرتێری گشتیی ڕێكخراوی نەتەوە یەكگرتووەكان لە عێراق و ژمارەیەك ڕاوێژكار و بەرپرسی نەتەوە یەكگرتووەكان و بانكی جیهانی و بانكی گەشەپێدانی ئیسلامی.

لە دیدارەكەدا سەرۆك بارزانی زۆر بە گەرمی بەخێرهاتنی سكرتێری گشتیی نەتەوە یەكگرتووەكان و سەرۆكی بانكی جیهانی و سەرۆكی بانكی گەشەپێدانی ئیسلامی و شاندی یاوەریان كرد و هاتنی ئەو شاندە بەرزەی كۆمەڵگەی نێودەوڵەتی بۆ هەرێمی كوردستان بە پڕبایەخ و مایەی ئومێد بۆ گەلی كوردستان وەسف كرد. سەرۆك بارزانی لە وتەیەكدا باسی لە قوربانیدانی گەلی كوردستان كرد لە شەڕی دژی تیرۆریستان و ئەوەیشی خستەڕوو كە سەرباری شەڕێكی قورس، كوردستان ڕووبەڕووی تەحەدیی قەیرانی دارایی بووەتەوە و سەدانهەزار ئاوارەیشی حەواندووەتەوە و وێڕای ئاماژەدان بە هۆكارەكانی قەیرانی دارایی ئەوەیشی باس كرد كە هەتا ئێستا هیچ لایەنێك لەڕووی دارایی هاوكاریی كوردستانی نەكردووە و حكوومەتی عێراقیش كاری بە پابەندبوونەكانی نەكردووە لە یارمەتیدانی هەرێمی كوردستان بۆ حەواندنەوەی ئاوارەكان. لە بەشێكی دیكەی وتەكانیدا سەرۆك بارزانی ڕۆشنایی خستەسەر بەرنامەی چاكسازیی حكوومەتی هەرێم و ڕایگەیاند كە حكوومەتی هەرێم پابەندی هەموو پێوەر و ئەو بنەمایانە دەبێت كە بۆ چاكسازی پێویستن. سەرۆك بارزانی ئەوەیشی بە شاندی میوان ڕاگەیاند كە پێویستە كۆمەڵگەی نێودەوڵەتی لە هاوكاریكردنی عێراق و هەرێمی كوردستان ڕەچاوی ئەوە بكات كە بەشی زیاتری قورسایی شەڕی تیرۆر و تێچوونی پەنادانی ئاوارەكان بەر هەرێمی كوردستان كەوتووە. داوایشی كرد كە لە سەرخستنی پڕۆسەی چاكسازی و تێپەڕاندنی قەیرانی ئابووری ڕێكخراوی نەتەوە یەكگرتووەكان و دامەزراوە جیهانییەكان ڕێنوێنی و ڕاوێژی پێویست پێشكەشی حكوومەتی هەرێمی كوردستان بكەن.

هەر لەم دیدارەدا سكرتێری گشتیی ڕێكخراوی نەتەوە یەكگرتووەكان خۆشحاڵیی خۆی بۆ ڕەخساندنی دیدارەكە و سەردانی بۆ هەرێمی كوردستان نیشاندا و پیرۆزبایی جەژنی نەورۆزیشی لە سەرۆك بارزانی و گەلی كوردستان كرد و ڕایگەیاند كە لەگەڵ شاندە یاوەرەكەی بۆ نیشاندانی پاڵپشتی و هاوسۆزی بۆ گەلی كوردستان هاتووە و ستاییشی سەركردایەتیكردنی سەرۆك بارزانی و ئازایەتی و قوربانیدانی هێزی پێشمەرگەی كوردستانی كرد لە شكستدانی تیرۆریستان و جەختی لەوە كردەوە كە پێشمەرگە ناوێكی ناسراوە لە ئاستی جیهانیدا كە لە هێڵی یەكەمی پاراستنی جیهانە لە هەڕەشەی تیرۆر و ئاماژەیشی بەوەدا كە جیهان ئاگاداری ئەو تەحەدیاتانەیە كە ڕووبەڕووی هەرێمی كوردستان بووەتەوە و بە سەرۆك بارزانی ڕاگەیاند كە سەركەوتنی ئێوە لەم شەڕەدا و لە بارودۆخێكی سەختی ئابووری جێگەی سەرسامیی هەموو جیهانە. هەروەها سوپاسی گەلی كوردستان و حكوومەتی هەرێمیشی كرد كە شانیان داوەتە بەر حەواندنەوەی سەدانهەزار ئاوارە و لێقەوماو. سكرتێری گشتیی ڕێكخراوی نەتەوە یەكگرتووەكان سەرسامیی خۆی بۆ سەركردایەتییكردنی سەرۆك بارزانی ڕاگەیاند و ئەوەی دووپاتكردەوە كە كۆمەڵگەی نێودەوڵەتی پاڵپشتی هەوڵەكانی سەرۆك بارزانییە بۆ بەدیهاتنی ئاشتی و سەقامگیری.

هەر لەم دیدارەدا سەرۆكی بانكی جیهانی سەرۆك بارزانیی لە هەوڵەكانی بانكی جیهانی ئاگادار كردەوە بۆ یارمەتیدانی هەرێمی كوردستان و ڕەزامەندیی خۆیشی نیشاندا لەسەر بەرنامەی چاكسازیی و جددیبوونی حكوومەتی هەرێم لەمبارەیەوە و، ڕایگەیاند كە حكوومەتی هەرێم شاییستەی ئەوەیە جیهان پشتیوانی بێت. هەروەها لە بەشێكی دیكەی كۆبوونەوەكە سەرۆكی بانكی گەشەپێدانی ئیسلامی لە گوتەیەكدا تەئكیدی لە هاوسۆزیی و پەرۆشیی بانكی گەشەپێدانی ئیسلامی بۆ هەرێمی كوردستان كردەوە و ڕایگەیاند كە بۆ ئەوە هاتووە كە لەگەڵ بانكی جیهانیدا یارمەتیی حكوومەتی هەرێم بدەن لە سەرخستنی چاكسازی و یارمەتیدانی ئاوارەكان و هەروەها هاوكاریكردن بۆ گەڕاندنەوەی ژیان بۆ ناوچە ئازادكراوەكان.

لە كۆتایی دیدارەكەدا سەرۆك بارزانی سكرتێری گشتیی ڕێكخراوی نەتەوە یەكگرتووەكانی وەك دۆستێكی گەورەی گەلی كوردستان وەسفكرد و سوپاسی هەوڵ و ماندووبوونی تیمەكانی سەر بە نەتەوە یەكگرتووەكانی كرد كە لە كوردستاندا چالاكن.

جێگەی ئاماژەپێكردنە لەم كۆبوونەوەیەدا سەرۆكی حكوومەت و جێگری سەرۆكی حكوومەت و ڕاوێژكاری ئەنجوومەنی ئاساییشی هەرێم و وەزیری ناوخۆ و وەزیری پێشمەرگە بە وەكالەت و سەرۆكی دیوانی سەرۆكایەتیی هەرێم و وەزیری پلاندانان و بەرپرسی فەرمانگەی پەیوەندییەكانی دەرەوەی هەرێم و گوتەبێژی حكوومەتی هەرێمی كوردستان ئامادە بوون.

ڕۆژی سێشەممە 9ـی 2ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە جۆن كۆبیس نوێنەری تایبەتی سكرتێری گشتیی ڕێكخراوی نەتەوە یەكگرتووەكان لە عێراق دەكات.

لە دیدارەكەدا بارودۆخی سیاسی و ئەمنیی ناوچەكە و عێراق و هەروەها قەیرانی ئابووری و دارایی عێراق و هەرێمی كوردستان خرایە بەر باس و جەخت لەسەر ئەنجامدانی چاكسازی و هەروەها پێویستی بەدەنگەوەهاتنی كۆمەڵگەی نێودەوڵەتی و یارمەتیدانی هەرێمی كوردستان و عێراق كرایەوە.

نوێنەری تایبەتی سكرتێری گشتیی ڕێكخراوی نەتەوە یەكگرتووەكان لە عێراق وێڕای ئاماژەدان بە بارودۆخی سەختی دارایی هەرێم و ئەركی قورسی خەرجییەكانی شەڕ و حەواندنەوەی ئاوارەكان، ڕۆشنایی خستە سەر قەیرانی دارایی كە عێراق و هەرێمی كوردستانی گرتووەتەوە و سەرۆك بارزانی لەو هەوڵ و چالاكیانە ئاگادار كردەوە كە بۆ دۆزینەوەی ڕێگەچارەی قەیرانەكە و یارمەتیدانی دارایی بەغدا و هەولێر لەگەڵ باڵیۆز و نوێنەری وڵاتانی ئەوروپایی و گرووپی 7 ئەنجامی داوە. نوێنەری تایبەتی سكرتێری گشتیی ڕێكخراوی نەتەوە یەكگرتووەكان لە عێراق بۆچوونی ڕێكخراوەی نەتەوە یەكگرتووەكانی لەبارەی بارودۆخی ناوخۆی عێراق و چۆنیەتی چارەسەركردنی گرفتەكان بە سەرۆك بارزانی ڕاگەیاند.

لە بەشێكی دیكەی ئەو دیدارەدا باس لەو مەترسی و تەحەدیاتانە كرا كە لە ئاییندەدا ئەگەری ڕوودانیان لە عێراق و ناوچەكەدا هەیە و سەرۆك بارزانی ئەوەی دووپاتكردەوە كە گەلی كوردستان سەرباری قوربانیدانێكی زۆر و مێژووییەكی دوورودرێژی خەبات بە هەموو توانایەك هەوڵی دا كە سەقامگیری و پێكەوەیی و دیموكراسی و فیدرالیەت لە عێراقدا بچەسپێت و سووریشە لەسەر داواكاری و مافەكانی خۆی و هیچ جۆرە گوشارێكی سیاسی و ئابووری و سەربازی و ئەمنی ناتوانێ وا بكات گەلی كوردستان دەستبەرداری ماف و ئاواتەكانی بێت.

هەر لەم كۆبوونەوەیەدا هەر دوولا بیروڕای خۆیان لەبارەی پڕۆسەی سیاسیی هەرێمی كوردستان ئاڵوگۆڕ كرد.

جێگەی ئاماژەپێكردنە لەم دیدارەدا سۆكۆل كۆندی نوێنەری ڕێكخراوی نەتەوە یەكگرتووەكان لە شاری هەولێر كە كۆتایی بە ئەرك و كارەكانی هاتووە، بە بۆنەی كۆتاییهاتنی ئەركەكانی لە هەولێر سوپاسی سەرۆك بارزانی و حكوومەتی هەرێمی كوردستان كرد كە لە ماوەی كاركردنیدا ئاسانكاری و هاوكاریی زۆریان بۆ ڕێكخراوەكانی سەر بە نەتەوە یەكگرتووەكان كردووە و سەرۆك بارزانیش وێڕای دەستخۆشی لە ماندووبوونی نوێنەری ڕێكخراوی نەتەوە یەكگرتووەكان لە هەولێر، هیوای سەركەوتنی بۆ خواست لە ئەرك و كاری تازەیدا.

ڕۆژی یەكشەممە 6ـی 12ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە جان كۆبیس نوێنەری تایبەتی سكرتێری گشتیی ڕێكخراوی نەتەوە یەكگرتووەكان و شاندێكی یاوەری كرد.

لە دیدارەكەدا نوێنەری تایبەتی سكرتێری گشتیی ڕێكخراوی نەتەوە یەكگرتووەكان پیرۆزبایی سەركەوتنەكانی پێشمەرگە و ئازادكردنی شنگالی لە سەرۆك بارزانی كرد و پێزانینیشی بۆ ڕۆڵ و ماندووبوون و قوربانیدانی پێشمەرگە هەبوو لە شەڕی تیرۆریستان و ئەوەیشی ڕاگەیاند كە هەموو جیهان بە پەرۆشەوە چاوەڕێی ئازادبوونی شنگالیان دەكرد و ئەوەیش بە دەست و توانستی پێشمەرگە هاتەدی.

لەبەشێكی دیكەی قسەكانیدا ئەوەی بۆ سەرۆك بارزانی خستەڕوو كە ڕێكخراوی نەتەوە یەكگرتووەكان خوازیاری سەقامگیریی ناوچەكە و هەرێمی كوردستان و عێراقە و بە نیگەرانییەوە بەدواداچوون بۆ پێشهاتە و گۆڕانكارییەكان و ئاڵۆزتربوونی ململانێی تاییفی و فراوانتربوونی توندڕۆیی لە ناوچەكە دەكات و هەروەها ئاماژەیشی بەوەدا كە ئاگاداری بارودۆخی ئابووری و ئەركی قورسی شەڕن كە لەسەر شانی هەرێمی كوردستانە و بە باشیشی زانی كە وڵاتان جگە لە هاوكاریی مرۆیی لەڕووی ئابووریشەوە یارمەتیی كوردستان و عێراق بدەن بۆ ئەوەی بتوانن بەسەر كێشەكانیاندا سەربكەون و تیرۆریستانیش شكست بدەن.

لەبەرانبەردا سەرۆك بارزانی باسی لە وردەكاریی پلانی ڕزگاركردنی شنگال بۆ شاندی میوان كرد و ئەو سەركەوتنەی بە سەركەوتنێكی مەزن بۆ گەلی كوردستان وەسف كرد. هەروەها ئاماژەیشی بە هەڵوێست و سیاسەتی هەرێمی كوردستانی عێراق كرد لەبەرانبەر شەڕی تیرۆریستان و ئەو ململانێ تاییفییەی كە لە ناوچەكە لە ئارادایە و ڕایگەیاند، گەلی كوردستان خاوەنی دۆزی ڕەوای خۆیە و بە هیچ شێوەیەك بەشێك لەو ململانێیە نەبووە و ناشبێتە بەشێك لەو ململانێیە و دژی هیچ وڵاتێكیش نین لەو ململانێیەدا و ڕێگەیش نادەین كوردستان بكرێتە گۆڕەپانی تەسویەی حیساباتی هێزە تاییفی و ناوچەییەكان. لەگەڵ ئەوەیشدا هەرێمی كوردستان پێشوازی لە هەموو جۆرە هەوڵ و یارمەتییەك دەكات كە بە ئامانجی شەڕكردن لەگەڵ تیرۆریستانی داعش بێت و سوپاسی ئەو وڵاتانەیش دەكەین كە لە شەڕی داعشدا پاڵپشتی هەرێمی كوردستانیان و ئەو پشتیوانییەمان لەبەرچاو دەبێت.

ئاڵۆگۆركردنی بیروڕا لەبارەی دواپێشهاتە سیاسییەكان لەسەر ئاستی هەرێمایەتی و دەولی و چارەسەركردنی قەیرانەكان تەوەرێكی دیكەی ئەم كۆبوونەوەیە بوو.

ڕۆژی پێنجشەممە 5ـی 11ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ئەداما دینگ ڕاوێژكاری تایبەتی سكرتێری گشتیی ڕێكخراوی نەتەوە یەكگرتووەكان بۆ ڕێگەگرتن لە جینۆساید و شاندێكی یاوەری كرد.

لە دیدارەكەدا ڕاوێژكاری تایبەتی سكرتێری گشتیی ڕێكخراوی نەتەوە یەكگرتووەكان باسی لە ئەو نەهامەتییانە كرد كە بەسەر گەلی كوردستاندا هاتووە و ڕایگەیاند كە لە نزیكەوە ئاگاداری مێژووی خەباتی كوردستانە و خۆی بە دۆست و هاوسۆزی گەلی كوردستان وەسفكرد. هەروەها هاوخەمیی خۆیشی نیشاندا بەهۆی ئەو كارەساتە یەك لەدوای یەكانەی بەسەر خەڵكی كوردستاندا هاتووە. ڕاوێژكاری تایبەتی سكرتێری گشتیی ڕێكخراوی نەتەوە یەكگرتووەكان نیگەرانیی خۆی لە ئەو كارەساتە نیشاندا كە لەلایەن تیرۆریستانەوە بەسەر ئێزیدی و پێكهاتەكانی دیكەدا هاتووە و سوپاسی سەرۆك بارزانیشی كرد كە پاڵپشتێكی گەورەی ئێزیدییەكان و پێكهاتە ئایینی و نەتەوەییەكانی تری عێراق و ناوچەكەیە و هەروەها ڕۆڵی سەرۆك بارزانی لە پاراستنی ژیانی پێكهاتەكان بەرز نرخاند و ڕایگەیاند كە دەبێ جیهان بزانێ كە سەرۆك بارزانی خەباتی بۆ ئازادی كردووە و هەوڵی بۆ پاراستنی مرۆڤایەتی داوە. لە بەشێكی دیكەی قسەكانیدا ڕاوێژكاری تایبەتی سكرتێری گشتیی ڕێكخراوی نەتەوە یەكگرتووەكان سوپاسی قوربانیدانی هێزی پێشمەرگەی كوردستانی كرد و پێزانینیشی هەبوو بۆ گەلی كوردستان كە سەرباری بارودۆخی خراپی ئابووری ملیۆنێك و پێنجسەدهەزار ئاوارەی حەواندووەتەوە. دواتریش سەرۆك بارزانیی لە ئەرك و چالاكییەكانی بۆ كۆكردنەوەی زانیاری لەسەر تاوانەكانی داعش لەدژی ئێزیدی و پێكهاتەكانی تر ئاگادار كردەوە.

لەبەرانبەردا سەرۆك بارزانی پاڵپشتیی تەواوی خۆی و ئامادەیی دامەزراوەكانی هەرێمی كوردستانی بۆ یارمەتیدانی ڕاوێژكاری تایبەتی سكرتێری گشتیی ڕێكخراوی نەتەوە یەكگرتووەكان ڕاگەیاند و ئەرك و چالاكییەكانی بە ئەركێكی گرنگ و پیرۆز وەسف كرد. سەرۆك بارزانی لە گوتەیەكدا باسی لە پێویستی پاراستنی هەموو پێكهاتەكان كردەوە و ئاماژەی بەوەدا كە مرۆڤ گەورەترین سەرمایەیە و پێویستە ئازاد بێت لە هەڵبژاردنی ئایین و بیروباوەڕی خۆی. وێڕای ئاماژەدان بە تاوان و وەحشیگەرییەكانی داعش باسیشی لەوە كرد كە كوردستان پەناگەی خەڵكی لێقەوماو و ئاوارەیە و یارمەتیدانیان ئەركێكی مرۆڤی و نیشتیمانییە و ئەوەیشی خستەڕوو كە بە هۆی كولتووری دەوڵەمەند و مێژوویی گەلی كوردستان پێكەوەژیان لە كوردستان ئاسانە و دوورە لە كێشە و گرفتی تاییفی. سەرۆك بارزانی باسی لەو قوربانیدانە مەزنە كرد كە پێشمەرگە لە پێناو مرۆڤایەتیی داوە و جەختیشی لەوە كردەوە كە نابێ فەرهەنگی تۆڵەسەندنەوە جێگەی یاسا بگرێتەوە وز گەلی كوردستان بە كردەوە ئەو بنەمایەی سەلماندووە.

هەر لەم دیدارەدا هەردوولا ئەوەیان دووپاتكردەوە كە بۆ بەدواداچوون لەسەر كەیسی تاوانەكان و جینۆساید و مافەكانی مرۆڤ لە پەیوەندی و هەماهەنگی و هاوكاریی بەردەوامدا بن.

سەرلەبەیانیی ئەمڕۆ سێشەممە 3/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز یان كۆبیش نێردەی تایبەتیی سكرتێری گشتیی نەتەوە یەكگرتووەكان و شاندێكی یاوەری كرد.

لە دیدارێكدا باس لە دوا پێشهاتەكانی ناوچەكە بە گشتی و هەرێمی كوردستان بە تایبەتی و پەیوەندییەكانی نێوان هەولێر و بەغدا كرا و لەمبارەیەوە بەڕێز كۆبیش ئاماژەی بەوە دا كە نەتەوە یەكگرتووەكان پشتگیریی تەواوی دانوستان و گفتوگۆكانی نێوان هەولێر و بەغدا دەكات بەمەبەستی چارەسەركردنی كێشەكان و گەیشتن بە ئەنجامێكی گونجاو كە لە بەرژەوەندیی خەڵكی هەموو عێراقدا بێت و هیوای خواست لە داهاتوودا كۆبوونەوە و دانوستانی نێوان هەردوولا ئەنجام بدرێن.

لە بەردەوامیی قسەكانیدا باسی لە بارودۆخی شەڕی هێزی پێشمەرگە دژی تیرۆرستانی داعش و هەوڵەكانی بنەبڕكردنی ترس و هەڕەشەی تیرۆری كرد و لەمبارەیەشەوە ڕۆڵ و نەبەردی و ئازایەتیی پێشمەرگەی بەرز نرخاند كە توانیویەتی ئەو هەڕەشەیە دوور بخاتەوە و بەسەر تیرۆردا زاڵ بێت. جەختی لەوەش كردەوە كە لەسەر ئاستی نێودەوڵەتی هەوڵی ئەوە دەدات پشتگیریی زیاتری پێشمەرگە بكرێت.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی كرد و هیوای خواست ئەو ڕۆڵە پۆزەتیڤەی نێردەی نەتەوە یەكگرتووەكان كە لە ڕابردوو و ئێستادا هەیبووە، بەردەوام بێت بەتایبەتی بۆ دانوستان و لێكگەیشتنی نێوان هەولێر و بەغدا. هەروەك پوختەیەكی دەربارەی  دوا پێشهاتەكان و بارودۆخی هەرێمی كوردستان و شەڕی پێشمەرگە دژی تیرۆرستانی داش پێشكەش كرد.

تاوتوێكردن و گۆڕینەوەی بیروڕا لەسەر چەند بابەت و تەوەرێك، لایەنێكی دیكەی دیدارەكەبوو.

ڕۆژی چوارشەممە 14ـی 10ـی 2015 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە جۆن كۆبینز نوێنەری تایبەتی سكرتێری گشتیی نەتەوە یەكگرتووەكان لە عێراق كرد.

لەم كۆبوونەوەیەدا نوێنەری تایبەتی سكرتێری گشتیی نەتەوە یەكگرتووەكان لە عێراق ڕاوبۆچوونی خۆی لەبارەی بارودۆخی ناوخۆی هەرێم و گرژییەكانی حەفتەی ڕابردوو بۆ سەرۆك بارزانی باس كرد و نیگەرانیی خۆی لەبەرانبەر گرژییەكان نیشاندا بە تایبەت كە توندوتیژی و هێرشكردنە سەر بارەگای لایەنەكان ئاكامی خراپی دەبێت و چارەسەری كێشەكان ناكات. هەروەها ئەوەیشی خستەڕوو كە سەقامگیریی هەرێمی كوردستان زۆر گرنگە بە تایبەت كە تەحەدیاتی ئابووری و شەڕی داعش ڕووبەڕووی هەرێمی كوردستان بووەتەوە. نوێنەری تایبەتی سكرتێری گشتیی نەتەوە یەكگرتووەكان لە عێراق ستاییشی بانگەوازی هێزی پێشمەرگەی كوردستانی كرد كە لە سەنگەری شەڕی داعش ئاراستەی لایەنە سیاسییەكان كرا بوو. ئامادەیی ڕێكخراوی نەتەوە یەكگرتووەكانیشی ڕاگەیاند كە هاوكاری لایەنە سیاسییەكان بێت بۆ چارەسەركردنی كێشەكان و داوای دانوساندن و لێكنزیكبوونەوەی لایەنەكانی كرد.

هەڕەشەی تیرۆریستان و بارودۆخی سیاسیی ناوچەكە و دوا گۆڕانكارییە سیاسی و ئەمنییەكان تەوەرێكی دیكەی كۆبوونەوەكە بوو.